A Federación Galega pola Cultura Marítima e Fluvial
CULTURMAR nace no ano 1993, ao abeiro dunha xuntanza de embarcacións tradicionais celebrada en Ribeira co obxectivo de defender, divulgar e dinamizar o Patrimonio marítimo de Galicia, particularmente as embarcacións tradicionais que o integran.
Desde o seu inicio caracterizouse pola realización de accións de recuperación do patrimonio material (embarcacións e tipoloxías) así como do inmaterial coa realización de regatas, concentracións e exhibicións conxuntas dos saberes mariñeiros co obxectivo de difundir este rico patrimonio a través do seu uso social e do fomento do asociacionismo cultural costeiro.
CULTURMAR, integrada por 43 colectivos de toda Galicia e do Norte de Portugal, está inscrita no Rexistro Central de Asociacións co número 2007/000185-2 (SC) e no Censo de Entidades culturais de Galicia, co código B-02.61/PO.406 sendo unha das súas principais singularidades, que as asociacións federadas conforman unha rede de voluntariado que traballa na defensa do patrimonio e da cultura marítimo-fluvial de Galicia.
Como resultado desta traxectoria na salvagarda do patrimonio material e inmaterial marítimo e fluvial de Galicia, Culturmar forma parte dende 2009 da European Maritime Heritage (EMH), convertíndose na única entidade de España en formar parte desa asociación co rango de representante estatal.
É ademais Premio da Cultura Galega 2015 na modalidade de PATRIMONIO, en recoñecemento ao labor en prol da salvagarda do patrimonio marítimo e fluvial de Galicia e en 2019 concedeuselle o PREMIO HGg&T na modalidade de ACERVO PATRIMONIAL, outorgado na XVII Gala do Turismo e Gastronomía de Galicia.
Grazas a todos os participantes, ao equipo que conforma o Comité Organizador, ao patrocinio das distintas institucións públicas así como á colaboración de diversas entidades e colectivos locais, facemos posible un ano máis o maior evento a prol da salvagarda e da promoción da cultura e do patrimonio mariñeiro de Galicia.
Organizan
Patrocinan
Colaboran
Agradecementos en especial a todos os patróns e patroas, tripulantes, equipo de voluntariado, mariñeir@s, artesáns, conferenciantes e resto de participantes no XVII Encontro de Embarcacións Tradicionais de Galicia