VIII Encontro de Embarcacións Tradicionais de Galicia

viii EncOntro

Máis dun cento de embarcacións procedentes de toda a Península Ibérica e de Francia participaron na gran celebración da cultura marítima e fluvial galega en Ferrol. O VIII Encontro de Embarcacións Tradicionais de Galicia, que tivo lugar entre o 5 e o 8 de xullo no peirao de Curuxeiras, serviu para divulgar o patrimonio marítimo mediante visitas, obradoiros, concertos, exposicións e encontros de especialistas.

Entre as actividades que se celebraron en Ferrol estaban unha selección de exposicións e información sobre asociacións e museos galegos, portugueses, asturianos, vascos e bretóns unidos polo seu traballo a prol da cultura marítima e fluvial. Ademais, realizáronse obradoiros destinados tanto a nenos coma a maiores, a través dos que coñecer de preto os traballos das redeiras, dos cesteiros, dos modelistas navais e doutros oficios vencellados ao mundo do mar. 

Unha das novidades deste evento foi a realización de xornadas técnicas, que versaron sobre a creación dun novo marco normativo para as embarcacións tradicionais e clásicas. O Encontro serviu tamén para volver o ollar sobre a navegación clásica e tradicional a través de visitas guiadas sobre diferentes tipoloxías de barcos. Así mesmo, as persoas visitantes puideron embarcarse a bordo dos buques clásicos ou ben nos botes de pasaxe da ría de Ferrol durante as regatas. O VIII Encontro estivo amenizado durante os catro días por música tradicional.