iX Encontro de Embarcacións Tradicionais de Galicia

IX EncOntro

A vila mariñeira de Muros acolleu entre os días 9 e 12 de xullo de 2009 a novena edición do Encontro de Embarcacións Tradicionais de Galicia. Durante catro días, gamelas, dornas, racús, galeóns, polbeiros, traiñeiras…, embarcacións tradicionais de remo e de vela procedentes de todos os portos de Galicia, de Portugal, de Euskadi e do Mediterráneo, inundaron a ría de Muros e Noia. O peirao de Muros ofreceu desde o primeiro día unha imaxe histórica, pola presenza das 150 embarcacións tradicionais que participan neste Encontro.

As actividades desa novena edición comezaron coa arrivada a porto dos veleiros participantes, as prácticas de navegación e o armamento do velamen dos navíos. Tamén se levaron a cabo distintas conferencias e coloquios sobre os ecomuseos e o desenvolvemento sostible, así como a presentación de proxectos de dinamización e posta en valor de elementos culturais marítimos.

O Encontro foi unha demostración dos logros conseguidos desde 1993 polas 41 asociacións de toda Galicia, unidas na Federación Galega pola Cultura Marítima e Fluvial, sensibilizadas coa recuperación e a posta en valor do patrimonio das nosas rías e ríos. Ao igual que en anteriores edición, o Encontro de Muros permitiu familiarizarse coa variada tipoloxía das embarcacións tradicionais galegas, antano utilizadas para a pesca artesanal ou para o transporte de mercadorías, e agora destinadas na súa maioría ao deporte e á navegación de recreo; descubrir o que diferenza unhas doutras, e coñecer os seus usos tradicionais, os tipos de aparellos, ou as formas da proa ou da popa.